मेहकर : समृद्धी महामार्गावर मंगळवारी पहाटे खाजगी ट्रॅव्हल्सच्या खाजगी बसला मेहकर नजीक शिवणी पिसा गावाजवळ आग लागली. या घटनेत मोठा अपघात घडण्याची शक्यता असतानाच वेळीच सतर्कतेमुळे मोठा अनर्थ टळला.
मेहकर : समृद्धी महामार्गावर मंगळवारी पहाटे खाजगी ट्रॅव्हल्सच्या खाजगी बसला मेहकर नजीक शिवणी पिसा गावाजवळ आग लागली. या घटनेत मोठा अपघात घडण्याची शक्यता असतानाच वेळीच सतर्कतेमुळे मोठा अनर्थ टळला.
मुंबई कॉरिडोरवरील चॅनल क्रमांक ३००.१ येथे नागपूरहून नाशिककडे जाणाऱ्या खाजगी बसला सकाळी शॉर्ट सर्किटमुळे अचानक आग लागल्याची घटना घडली होती. सुदैवाने या अपघातात कोणतीही जीवितहानी अथवा कुणालाही दुखापत झाली नाही. प्राप्त माहितीनुसार, मलकापूर पोलीस केंद्र अंतर्गत समृद्धी महामार्ग उपकेंद्र दुसरबीड येथे रात्रगस्त पेट्रोलिंग सुरू असताना सी आर ओ संभाजीनगर यांनी दूरध्वनीद्वारे माहिती दिली की चॅनल क्रमांक ३००.१ (मुंबई कॉरिडोर) येथे एका ट्रॅव्हलला आग लागलेली आहे. ही माहिती मिळताच सहायक पोलिस निरीक्षक संदीप इंगळे व त्यांचे सहकारी तसेच एम.एस.एफ.चे दोन जवान तातडीने घटनास्थळी रवाना झाले होते.
चालक व कर्मचाऱ्यांचे प्रसंगावधान
घटनास्थळी पोहोचल्यानंतर खुराणा ट्रॅव्हलची बस क्रमांक क्रमांक एम एच ४० सी टी ८०४३ ही रस्त्याच्या कडेला जळत असल्याचे दिसून आले. सदर ट्रॅव्हलचे चालक वाहिद शेख (वय ३६, रा. नागपूर) यांच्याकडे चौकशी केली असता त्यांनी सांगितले की, ट्रॅव्हलच्या वायरिंगमध्ये शॉर्ट सर्किट होऊन अचानक आग लागली. सदर बस नागपूर येथून नाशिककडे जात होती. वाहनामध्ये एकूण ३६ प्रवासी प्रवास करत होते. आग लागल्याची बाब लक्षात येताच चालक व कर्मचाऱ्यांनी प्रसंगावधान राखून सर्व प्रवाशांना तात्काळ सुरक्षितरित्या बाहेर काढले. कोणालाही कोणतीही दुखापत झाली नाही. त्यानंतर घटनास्थळी अग्निशमन दलाचे वाहन बोलावून आगीवर नियंत्रण मिळवण्यात आले.
सरकारी वाहनाने प्रवाश्यांना हलविले
अपघातानंतर प्रवाशांची गैरसोय होऊ नये म्हणून त्यांना सरकारी वाहनाने दुसरबीड टोलनाक्यावर सुरक्षितरीत्या सोडण्यात आले. अपघातग्रस्त ट्रॅव्हल रस्त्याच्या बाजूला हलवण्यात आल्याने समृद्धी महामार्गावरील वाहतूक सुरळीत सुरू झाली आहे. ही घटना मेहकरजवळील शिवणी पिसा गावालगत समृद्धी महामार्गावर घडली असून वेळेवर मदतकार्य व पोलीस प्रशासनाच्या तत्परतेमुळे मोठी दुर्घटना टळल्याने प्रवाशांनी सुटकेचा निःश्वास सोडला.
