वाशिम : महावितरणच्या अकोला परिमंडळातील वीज ग्राहकांकडून वीज बिल भरण्याकडे होत असलेले दुर्लक्ष महावितरणसाठी चिंताजनक ठरत आहे. परिणामी तब्बल २४६ कोटी रुपयांच्या थकीत वीज बिल वसुलीसाठी मुख्य अभियंता राजेश नाईक यांच्या मार्गदर्शनाखाली वीज बिल वसूली मोहिम तीव्र करण्यात आली असून, वरिष्ठ अधिकारीही प्रत्यक्ष रस्त्यावर उतरले आहेत.
वाशिम : महावितरणच्या अकोला परिमंडळातील वीज ग्राहकांकडून वीज बिल भरण्याकडे होत असलेले दुर्लक्ष महावितरणसाठी चिंताजनक ठरत आहे. परिणामी तब्बल २४६ कोटी रुपयांच्या थकीत वीज बिल वसुलीसाठी मुख्य अभियंता राजेश नाईक यांच्या मार्गदर्शनाखाली वीज बिल वसूली मोहिम तीव्र करण्यात आली असून, वरिष्ठ अधिकारीही प्रत्यक्ष रस्त्यावर उतरले आहेत.
वीजबिल वसुली हा महावितरणचा एकमेव आर्थिक स्त्रोत असल्याने प्रत्येक महिन्यात शंभर टक्के वसुली होणे अपेक्षित आहे. मात्र तसे होत नसल्याने महावितरणला कारवाईसाठी मोहिम अधिक कठोर करावी लागली आहे. या मोहिमेत थकबाकीदार वीज ग्राहकांचा वीज पुरवठा खंडित करण्याचे निर्देश देण्यात आले आहेत. प्रत्येक कर्मचार्याला ठराविक उद्दिष्ट देण्यात आले असून त्यानुसार कारवाईला वेग आला आहे. परिमंडळाअंतर्गत अकोला, बुलढाणा आणि वाशिम जिल्ह्यातील ५ लाख ३ हजार ५३७ घरगुती ग्राहकांकडे १९१ कोटी ७२ लाख रुपये थकीत आहेत. तसेच वाणिज्यिक वर्गवारीतील ३२ हजार ८८६ ग्राहकांकडे २२ कोटी ३४ लाख रुपयांचे थकीत आहे, तर सार्वजनिक सेवा आणि इतर वर्गवारीतील ७ हजार ६६७ ग्राहकांकडे १० कोटी रुपयांची थकबाकी आहे. वीज ग्राहकांना अखंडित सेवा देण्याची जबाबदारी महावितरणची असली, तरी वेळेत वीज बिल भरण्याची जबाबदारी ग्राहकांची आहे. महावितरणच्या प्रत्येक कर्मचार्याने आपल्या कार्यक्षेत्रातील थकबाकीदारांना वेळेत व नियमितपणे बिल भरण्याची सवय लावावी, असे निर्देश देण्यात आले आहेत. अन्यथा प्रतिसाद न देणाऱ्या ग्राहकांचा वीज पुरवठा खंडित करून त्याची नोंद ऑनलाइन प्रणालीत करावी. तसेच संबंधित ग्राहकाची थकबाकी त्यांच्या सुरक्षा ठेवीतून वसूल करण्यात यावी. पुढे पुनर्जोडणी शुल्क आणि सुरक्षा ठेव भरल्याशिवाय त्या ग्राहकाचा वीज पुरवठा पुन्हा सुरू करू नये, असे स्पष्ट आदेश मुख्य अभियंता यांनी दिले आहेत.
