बिहार विधानसभा निवडणुकीचे बिगुल वाजले: दोन टप्‍प्‍यात होणार निवडणूक; १४  नोव्‍हेंबर रोजी निकाल

पाटणा :  निवडणूक आयोगाने 6 ऑक्टोबर रोजी बिहार विधानसभा निवडणुकीचा कार्यक्रम जाहीर केला. बिहारमध्ये ६ आणि ११ नोव्हेंबर रोजी दोन टप्प्यात निवडणूक होणार आहे. १४ नोव्हेंबर रोजी मतमोजणी होणार आहे, अशी माहिती मुख्य निवडणूक आयुक्त ज्ञानेश कुमार यांनी पत्रकार परिषदेत दिली.

पाटणा :  निवडणूक आयोगाने 6 ऑक्टोबर रोजी बिहार विधानसभा निवडणुकीचा कार्यक्रम जाहीर केला. बिहारमध्ये ६ आणि ११ नोव्हेंबर रोजी दोन टप्प्यात निवडणूक होणार आहे. १४ नोव्हेंबर रोजी मतमोजणी होणार आहे, अशी माहिती मुख्य निवडणूक आयुक्त ज्ञानेश कुमार यांनी पत्रकार परिषदेत दिली.

बिहारमधील २४३ विधानसभेच्या जागांसाठी दोन टप्प्यात मतदान होणार आहे. ६ आणि ११ नोव्हेंबर रोजी मतदान होणार आहे. निवडणुकीच्या घोषणेपासून मतमोजणीपर्यंतची संपूर्ण प्रक्रिया एकूण ४० दिवस चालेल. २०१० मध्ये निवडणूक प्रक्रिया ६१ दिवस, २०१५ मध्ये ६० दिवस आणि २०२० मध्ये ४७ दिवस चालली. अशा प्रकारे, यावेळी गेल्या १५ वर्षातील सर्वात कमी कालावधीत निवडणुका पूर्ण होतील. सर्व राजकीय पक्षांनी निवडणूक आयोगाला दिवाळी आणि छठ नंतर मतदानाच्या तारखा ठेवण्याचे आवाहन केले होते.

बिहारमध्ये ४० वर्षांनंतर दोन टप्प्यात निवडणुका 

बिहारमध्ये ४० वर्षांनंतर दोन टप्प्यात निवडणुका होत आहेत. यापूर्वी १९८५ मध्ये दोन टप्प्यात निवडणुका झाल्या होत्या. राज्यात २४३ जागा आहेत, ज्यामध्ये अंदाजे ७४.२ दशलक्ष मतदार आहेत, ज्यात १०० वर्षांवरील १४,००० मतदारांचा समावेश आहे. मतदान केंद्रांवर प्रवास करण्यास असमर्थ असलेले लोक फॉर्म १२डी भरून घरून मतदान करू शकतील. 

२२ वर्षांनंतर बिहारमध्ये मतदार यादी पुनरीक्षण

मुख्य निवडणूक आयुक्त ज्ञानेश कुमार यांनी यावेळी विशेष सखोल पुनरीक्षण (एसआयआर) प्रक्रियेवरही भाष्य केले. ते म्हणाले, सुमारे २२ वर्षांनंतर बिहारमध्ये मतदार यादी पुनरीक्षण झाले. २४३ विधानसभा मतदारसंघांमध्ये १.६ लाख बूथ लेव्हल एजंट्सच्या मदतीने हे काम पूर्ण झाले आहे. कोणत्याही मतदान केंद्राबाहेर मतदार आपला मोबाईल फोन जमा करू शकतो आणि मतदान झाल्यानंतर तो परत घेऊन जाऊ शकतो, असेही ज्ञानेश कुमार यांनी सांगितले.

बिहार विधानसभा निवडणुकीची आकडेवारी

राज्यात एकूण जागा: २४३

खुल्‍या प्रवर्गासाठी जागा: २०३

अनुसूचित जमाती (एसटी) जागा: ०२

अनुसूचित जाती (एससी) जागा: ३८

एकूण मतदार: ७.४२ कोटी

ज्येष्ठ मतदारांची संख्या: ४ लाख

१०० वर्षे पूर्ण केलेले मतदार: १४ हजार

प्रथमच मतदान करणारे मतदार: १४ लाख