Amravati Bus Accident:मेळघाटातील सोमाडोह परिसरातील धारणी जवळ एक खासगी प्रवासी बस पुलावरून नदीत कोसळल्याची घटना सोमवारी सकाळी घडली. अपघातात ६ प्रवाशांचा मृत्यू झाल्याची माहिती सूत्रांनी दिली आहे.
अमरावती : मेळघाटातील सोमाडोह परिसरातील धारणी जवळ एक खासगी प्रवासी बस पुलावरून नदीत कोसळल्याची घटना सोमवारी सकाळी घडली. अपघातात ६ प्रवाशांचा मृत्यू झाल्याची माहिती सूत्रांनी दिली आहे. या बसमधून शिक्षक आणि शाळेवरील कर्मचारी प्रवास करत असल्याची माहिती घटनास्थळावरील नागरिकांनी दिली आहे. या बसमधील अनेक प्रवाशांना मोठी दुखापत झाल्याने घटनास्थळी बचावकार्य सुरू आहे.
शनिवारी आणि रविवारी सुट्टी असल्यामुळे धारणी, हरीसाल, सेमाडोह या ठिकाणी शासकीय सेवेत असणारे अनेक कर्मचारी शुक्रवारी अमरावतीला आले. आठवड्याचा पहिला दिवस असल्याने सोमवारी सकाळी अमरावतीतूनच ही खासगी बस सुमारे ५५ ते ६० प्रवाशांना घेऊन धारणीकडे निघाली. सीमाडोह जवळ खासगी बस नदीत कोसळताच अनेक प्रवासी एकमेकांच्या अंगावर दबले. सेमाडोह येथील रहिवाशांनी बसमधील प्रवाशांना वाचवण्याचा शर्थीचे प्रयत्न केले. घटनास्थळीत चार जण दगावले होते तर दोघं उपचारासाठी रुग्णवाहिकेतून परतवाड्याच्या दिशेनं निघाले असतानाच रस्त्यात दगावले. या घटनेमुळे अमरावती शहरात देखील खळबळ उडाली असून या बसमध्ये असणाऱ्या मृत आणि जखमी प्रवाशांच्या नातेवाईकांनी परतवाड्याच्या दिशेनं धाव घेतली. या अपघातात पन्नास जण गंभीर जखमी झालेत.
चालकाचे नियंत्रम सुटल्याने अपघात
ही खासगी बस अमरावतीवरुन धारणीला निघाली होती. खासगी ट्रॅव्हल्स कंपनीची बस नेहमीप्रमाणं सकाळी सहा वाजता अमरावती इथून धारणीला निघाली. सकाळी साडेआठ वाजेच्या सुमारास सेमाडोह इथल्या भूतखोरा परिसरात धोक्याच्या वळणावर असणाऱ्या नदीच्या पुलावर बस चालकाचं नियंत्रण सुटलं आणि ही बस पुलाखाली नदीत कोसळली. घटनास्थळावर प्रचंड आक्रोश सुरू झाल्यानं परिसरातील नागरिकांनी घटनास्थळावर धाव घेतली.
स्थानिकांसह बचाव पथक आले धावून
हा अपघात घडताच सेमाडोह इथले नागरिक घटनास्थळी धावून गेले. व्याघ्र प्रकल्पाचे कर्मचारी देखील घटनास्थळी पोहोचले. नदीत कोसळलेल्या अपघातग्रस्त बसमधील प्रवाशांना सुरक्षित बाहेर काढण्यासाठी प्रयत्न करण्यात आले. या अपघाताची माहिती परतवाडा, चिखलदरा आणि धारणी पोलिसांना देण्यात आली. या तिन्ही शहरातून बचाव पथक अपघातस्थळी रवाना झाल्याची माहिती सूत्रांनी दिली आहे.
