बुलढाणा : भारत निवडणूक आयोगाच्या मार्गदर्शनानुसार अमरावती विभागातील शिक्षक विधानपरिषद मतदारसंघाच्या मतदार यादीचे पुनरिक्षण करुन नव्याने मतदार याद्या तयार करण्याचा कार्यक्रम जाहीर करण्यात आला असल्याचे पत्रक सहाय्यक मतदार नोंदणी अधिकारी तथा जिल्हाधिकारी डॉ. किरण पाटील यांनी जारी केले आहे.
बुलढाणा : भारत निवडणूक आयोगाच्या मार्गदर्शनानुसार अमरावती विभागातील शिक्षक विधानपरिषद मतदारसंघाच्या मतदार यादीचे पुनरिक्षण करुन नव्याने मतदार याद्या तयार करण्याचा कार्यक्रम जाहीर करण्यात आला असल्याचे पत्रक सहाय्यक मतदार नोंदणी अधिकारी तथा जिल्हाधिकारी डॉ. किरण पाटील यांनी जारी केले आहे. शिक्षक मतदारसंघातील बुलढाणा जिल्ह्यातील सर्व पात्र शिक्षकांनी वेळापत्रकानुसार सहायक मतदार नोंदणी अधिकारी यांच्या कार्यालयात तसेच पदनिर्देशित अधिकारी यांचे तहसिल कार्यालयात 30 सप्टेंबर ते 6 नोव्हेंबर, 2025 या कालावधीत विहित नमूना-19 मधील अर्ज आवश्यक ते पुरावे व प्रमाणपत्रांसह दाखल करावेत, असे आवाहन अमरावती शिक्षक मतदारसंघाचे सहाय्यक मतदार नोंदणी अधिकारी तथा जिल्हाधिकारी डॉ. किरण पाटील यांच्यावतीने करण्यात आले आहे.
बुलढाणा जिल्ह्यातील पात्र शिक्षकांना संबंधित शिक्षक विधानपरिषद मतदारसंघाच्या मतदार यादीमध्ये नाव नोंदणी करण्यासाठी नमुना 19 व आवश्यक कागदपत्रासह तसेच त्यासोबत विहित नमुन्यातील संबधित शैक्षणिक संस्थेच्या प्रमुखाने दिलेले प्रमाणपत्रासह सादर करणे आवश्यक आहे. हा नमुना 19 व विहित प्रमाणपत्राचा नमुना जिल्हाधिकारी, उपविभागीय अधिकारी (या निवडणूकीचे सहा. मतदार नोंदणी अधिकारी), विभागीय आयुक्तांकडून पदनिर्देशित केलेले तहसिलदार यांच्या कार्यालयात तसेच राज्याचे मुख्य निवडणूक अधिकारी, यांचे संकेतस्थळावर उपलब्ध राहणार आहे. या विहीत नमुन्यात भरलेले अर्ज संबंधित तहसिल कार्यालयात भरुन देता येणार आहे.
30 डिसेंबर रोजी अंतिम मतदार यादी
या पुनरिक्षण कार्यक्रमानुसार 30 सप्टेंबर रोजी सूचना प्रसिद्धी, 15 ऑक्टोबर 2025 प्रथम पुनःप्रसिद्धी, 25 ऑक्टोबर रोजी द्वितीय पुनःप्रसिद्धी, नमुना 18 व 19 द्वारे दावे व हरकती सादर करण्याची अंतिम तारीख 6 नोव्हेंबर राहील. 20 नोव्हेंबर रोजी हस्तलिखिते तयार करणे व प्रारूप मतदार याद्यांची छपाई करुन 25 नोव्हेंबर रोजी प्रारूप मतदार याद्या प्रसिद्ध केली जाईल. त्यानंतर 25 नोव्हेंबर ते 10 डिसेंबरपर्यंत दावे व हरकती स्वीकारण्यात येतील. 25 डिसेंबरपर्यंत दावे व हरकती निकाली काढून पुरवणी यादी तयार करण्यात येईल. या पुनरिक्षण कार्यक्रमाच्या शेवटी 30 डिसेंबर 2025 रोजी अंतिम मतदार यादी प्रसिद्ध करण्यात येईल.
अशी राहणार मतदार नोंदणीची पात्रता
लोकप्रतिनिधित्व अधिनियमानुसार राज्य शासनाने निवडणूक आयोगाच्या मान्यतेने निश्चित केलेल्या माध्यमिक शाळेपेक्षा कमी दर्जा नसलेल्या शैक्षणिक संस्थांमध्ये मागील 6 वर्षामध्ये किमान 3 वर्षे पूर्णवेळ शिक्षक म्हणून कार्यरत असलेले शिक्षक मतदार म्हणून नोंदणीस पात्र असून त्यांना मतदार नोंदणीसाठी सुधारित नमूना क्रमांक 19 मध्ये आवश्यक कागदपत्रांसह व प्रमाणपत्रांसह अर्ज सादर करता येणार आहे. या कार्यक्रमानुसार अमरावती विभागासाठीची शिक्षक विधानपरिषद मतदार संघाची यादी नव्याने तयार करण्याच्या सूचना निर्गमित झाल्या असल्याने ज्या व्यक्तींची नावे अमरावती विभाग शिक्षक मतदारसंघाच्या विद्यमान मतदार यादीमध्ये समाविष्ट आहेत, त्यांनीही नव्याने नमूना-19 आवश्यक कागदपत्रांसह व प्रमाणपत्रासह सादर करणे आवश्यक राहणार आहे.
