सकल मराठा समाजाचे पोलीस आयुक्तांना निवेदन
मराठा समाजातील महिलांविषयी अत्यंत आक्षेपार्ह भाष्य केल्याचा आरोप नवनाथ वाघमारे यांच्यावर करण्यात आला आहे. या प्रकरणी सकल मराठा समाजाने पोलिस आयुक्तांना निवेदन देऊन कारवाई करण्याची मागणी केली आहे. महिलांविषयी अशा प्रकारची वक्तव्ये ही त्यांच्या प्रतिष्ठेला बाधा आणणारी असून, त्यामुळे समाजात संतापाची भावना निर्माण झाली आहे.
छत्रपती संभाजीनगर : मराठा समाजातील महिलांविषयी कथितरीत्या अवमानकारक व प्रक्षोभक वक्तव्य केल्याप्रकरणी नवनाथ वाघमारे यांच्याविरुद्ध तातडीने गुन्हा दाखल करून कठोर कायदेशीर कारवाई करावी, अशी मागणी सकल मराठा समाजाच्या वतीने पोलीस आयुक्तांकडे करण्यात आली आहे.
यासंदर्भात पोलीस आयुक्त, छत्रपती संभाजीनगर यांना मंगळवार, १८ ऑगस्ट रोजी निवेदन देण्यात आले. प्रसारमाध्यमे व वृत्तवाहिन्यांवर प्रसारित झालेल्या व्हिडिओ क्लिपचा संदर्भ देत, वाघमारे यांनी जाहीर सभेत मराठा समाजातील महिलांविषयी अत्यंत आक्षेपार्ह भाष्य केल्याचा आरोप निवेदनात करण्यात आला आहे. महिलांविषयी अशा प्रकारची वक्तव्ये ही त्यांच्या प्रतिष्ठेला बाधा आणणारी असून, त्यामुळे समाजात संतापाची भावना निर्माण होऊन सामाजिक सलोखा व कायदा-सुव्यवस्थेचा प्रश्न निर्माण होऊ शकतो, असे निवेदनात नमूद करण्यात आले आहे.
या प्रकरणातील व्हिडिओ व इतर उपलब्ध पुराव्यांची सत्यता तपासून संबंधित व्यक्तीविरुद्ध लागू असलेल्या कायदेशीर तरतुदींनुसार तातडीने FIR दाखल करावा, तसेच भविष्यात अशा प्रकारची प्रक्षोभक व समाजात तेढ निर्माण करणारी वक्तव्ये होणार नाहीत, यासाठी प्रतिबंधात्मक उपाययोजना कराव्यात, अशी मागणी करण्यात आली आहे.
या निवेदनावर ॲड. सुवर्णा मोहिते, दीपक पवार, बाबुराव चौधरी, ज्ञानेश्वर कणके, शारदा शिंदे, किरण वालतुरे, डॉ. मनीषा मराठे, कल्पना साखळे, विजयश्री तुपे, निलेश जवळे, अतुल तवार, योगेश शिंदे, सीमा शिंदे, सुवर्णा तुपे, प्रशांत इंगळे, अरुण नवले, शुभ्रा कदम, बाळासाहेब मोरे, गजानन लांडगे, देविदास पाठे पाटील, माऊती मुरखारे, संजय वावडे आदींच्या स्वाक्षऱ्या आहेत.
